16-17 желтоқсан Қазақстан Республикасы Тәуелсіздігінің 24 жылдығына орай «Мұрағат құжаттары – Тәуелсіздік куәгерлері» атты электронды көрмеге орналастыруға жататын құжаттар тізімі

2015 жылғы 16-17 желтоқсанда Қазақстан Республикасының тәуелсіздігіне 24 жыл толады. Осы мерекеге орай тәуелсіздіктің алғашқы жылдарындағы Батыс Қазақстан облысының әлеуметтік-экономикалық даму тарихына қатысты құжаттардан «Мұрағат құжаттары-Тәуелсіздік куәгерлері» атты электрондық көрмесін ұсынамыз.

Қазақстанның тәуелсіздікке қол жеткізіп, егемен ел болуы төл тарихымызды жаңаша зерделеуге мүмкіндік берді. Бүгінде еліміздің тарихында өзіндік терең із қалдырған тарихи оқиғаларға ұлттық мүдде тұрғысынан лайықты баға беру жолында ғылыми-зерттеу жұмыстары жүргізілуде.

Ақжайық өңірі – барлық жерлердегідей нарықтың тар жол тайғақ кешуінен аман–есен өтіп, бүгінде шаруасын түгендеп, өндірісін өрге сүйреп, құрылысын көріктендіріп, газы мен мұнайын ел игілігіне жаратып, еліміздің іргесін бекіте түсуге өзіндік үлес қосып жатқан әлеуетті аймақ.

Мұрағаттық деректер бойынша өңір экономикасын дамытуда Батыс Қазақстан облысында «1998-2000 жылдарға арналған Батыс Қазақстан облысының дамуы» атты стратегиялық жоспар қабылданып, халықтың әл-ауқатын көтеруде көп жұмыстар атқарылды.

Стратегиялық жоспарда облыс экономикасы, әлеуметтік саласы, ауыл шаруашылығы, шағын және орта кәсіпті дамыту, инвестициялар тарту, электроэнергетиканы дамыту, халықты жұмыспен қамту, бюджеттік тапшылықты қысқарту қамтылған.

Еліміз мемлекеттік тәуелсіздігін жариялап, дербес даму жолын таңдауына байланысты Батыс Қазақстан облысының саяси-әлеуметтік, экономикалық өмірінде, жергілікті басқару жүйесінде түбегейлі өзгерістер жүзеге асты. Сондай-ақ, батысқазақстандықтар республика ауқымындағы маңызды мемлекеттік, қоғамдық шараларға белсене қатысып, саяси-құқықтық және экономикалық реформаларды жүзеге асыруға үлес қосып келеді.

Қазіргі уақытта Қазақстан әлемдік қоғамдастықтан өзінің лайықты орнын иеленіп, тең құқылы серіктестікке айналып қана қойған жоқ, сонымен қатар, аймақтық және жаһандық, экономикалық-саяси мәселерді шешуде көптеген елдерден көш бойы озып отыр.

Жас тәуелсіз мемлекеттің қалыптасуы Қазақстан Республикасының тұңғыш Президенті Н.Ә.Назарбаевтың есімімен тығыз байланысты.

Тәуелсіздік алған жылдар ішінде Елбасы талай рет республикамыздың батыстағы қақпасы – Батыс Қазақстан облысына іссапарлармен келіп, Жайық жұртшылығымен жүздесіп, тыныс тіршілігімен танысты.

Осы көрмені дайындау барысында Қазақстан Республикасы Президентінің мұрағаты мен Батыс Қазақстан облысының мемлекеттік мұрағатындағы құжаттар және «Жайық-Пресс» ЖШС-нің фотосуреттері қолданылды.

Көрменің негізгі мақсаты: Тәуелсіздікке 24 жыл толуына орай мұрағаттық құжаттардан егемендіктің алғашқы жылдарында Батыс Қазақстан облысының әлеуметтік-экономикалық даму тарихын оқырман қауымға таныстыру

Міндеттері:

- Оқырмандарды облыс тарихымен таныстыру;

- Батыс Қазақстан облысының мемлекеттік мұрағатында сақтауда тұрған өлкенің дамуына қатысты құжаттарды жариялау;

- Еліміздің дамуына Ақжайық өңірінің де үлес қосқанын көрсету;

- Қазақстандық патриотизмді насихаттау.