8-10 сынып аралығындағы Назарбаев зияткерлік мектебінің оқушылары мұрағатта қонақта болды

Ағымдағы жылдың 10 маусымында Батыс Қазақстан облыстық мемлекеттік мұрағатында Астана, Алматы, Атырау, Павлодар, Шымкент қалаларының физика-математика бағытындағы «Назарбаев зияткерлік мектебінен» 8-10 сынып аралығында 40-қа жуық оқушылар келіп, мұрағат қызметімен танысты. Алдымен «Батыс Қазақстан облысының тарихы-жасампаздық пен жетістіктер жолы» атты көрме көрсетіліп, мұрағат қоймасына экскурсия жасалды. Содан соң оқушылар 1941-1945 жылдардағы Ұлы Отан соғысына қатысты 81 сақтау бірліктегі мұрағаттық құжаттарымен жұмыстанды. Оқушыларға мынадай тақырыптар бойынша мұрағаттық құжаттар ұсынылды: «Орал өңірінің экономикасы мен қарулы күштерін соғыс жағдайына бейімдеу шаралары», «Ұлы Отан соғысы кезінде Орал өңіріне эвакуацияланған адамдар мен өндіріс орындары», «Орал өңірінен шыққан Кеңес Одағының батырлары», «Ұлы Отан соғысы кезінде өлкедегі әскери госпитальдар», «Өлке тұрғындарының майданға көмегі», «Тылдағы тынымсыз еңбек», «Оккупациядан азат етілген аймақтарға көмек», сонымен қатар, соғыс кезінде шығарылған «Екпінді құрылыс» пен «Приуральская правда» газеттерімен де таныстырылды. Әсіресе, оқушылар Орал өңірінен шыққан Кеңес Одағының батыры Мәншүк Мәметова мен тағы басқа батырларға және майданнан келген хаттарға үлкен қызығушылық танытты.