БҚО мемлекеттік мұрағатының Жалпақтал филиалы бойынша 2015 жылдың қаңтар айында атқарған жетілдіру жұмысы туралы мәлімет
Жұмыс жоспарына сәйкес 2014 жылдың 19 желтоқсанынан 2015 жылдың 8 қаңтар аралығында №77 қордың 1944-1954 жылдар аралығындағы Батыс Қазақстан облысы, Жаңақала ауданы Еңбекшілер депутаттары Қарасамар ауылдық Кеңесінің 80 сақтау бірлігін құрайтын тізімдемелері жетілдіріліп, құжаттарына ғылыми-техникалық өңдеу жұмыстары жүргізілді.
Қордың мұрағаттық құжаттары бойынша Қарасамар ауылдық Кеңесі сол уақытта Жаңақала ауданына қараған, қазір Жаңақала ауданы, Маштексай ауылдық округіне қарасты Мұқыр елді мекені.
Ауылдық Кеңестің қамтуында «Калинин» колхозы болған, әр жылдарда колхозды Қ.Ескалиев, Темірғалиев атты азаматтар басқарған. Қарасамар ауылдық Кеңесінің атқару комитетінің әр жылдарда төрағалары А.Маташев, Мырзахмет Құсайынов, Отарбай Ислямов, Барша Бисеновалар болған.
1954 жылы ауылдық Кеңестің қамтуында жеті жылдық «Казарма» мектебі, Чапаев атындағы бастауыш мектебі (меңгерушісі Қуанышқали Сейтқалиев), кітапхана (меңгерушісі Есболсын Сариев), оқу үйі (меңгерушісі Тілеген Орахаев), фельдшерлік пункт (меңгерушісі Валентина Романенко) жұмыс істеген.
1954 жылы колхоздың шаруашылығында : ірі қара малы-1992 бас, қой-ешкі -10230 бас, жылқы- 637 бас, түйе- 199 бас болған.
Еңбекшілер депутаттары «Қарасамар» ауылдық Кеңесі Қазақ ССР-ның 30 жылдығы құрметіне социалистік жарысты ұйымдастыру туралы Павлодар облысының Максим Горький ауданындағы Песчанск ауылдық Кеңесінің үндеуін зор қуанышпен қарсы алып, Жаңақала ауданы, Еңбекшілер депутаттары «Жуантөбе» ауылдық Кеңесін социалистік жарысқа шақырған.
1950 жылы 1 қаңтарда ірі қара 1049 бас болса, оны 1951 жылы 1341 басқа жеткізіп, қой-ешкіні 6469 болса оны 9065 басқа жылқыны 419 дан 529 басқа, түйе малын 96 дан 111 басқа жеткізуге міндеттеме алған.
Ауыл көлемінде 2 клубты жөндеп, оларға 1 телефон орнатуға және екі радиопремник алуға, екі мал қорасын, 1 ұстахана, 6 колхозшыға үй салуына міндеттенген. Мектеп үйлерін, мед пунктті жөндеп, 1 жатахана үйін салуға міндеттенген.
Шала сауатты колхозшыларды сауаттандыру үшін ауыл көлемінде екі жерде үлкендер мектебін құруға міндеттенген.
Жетілдіру жұмыстарының нәтижесінде тізімдемелер қайтадан басылып, көпшілік істердің атаулары жаңадан редакцияланып, ғылыми-техникалық өңдеу жөніндегі актілері, тарихи анықтама толықтырылып және жаңартылып, қор картішкесі жаңадан жасақталып, мемлекеттік тілде толтырылды.
Филиалдың директоры Г.Едекешев
