Пресс-релиз
2019 жылдың 10 сәуірінде М.Өтемісов атындағы БҚМУ-нің «Қазақстан Республикасының тарихы» кафедрасының ұйымдастыруымен «Азалы тарихқа - мәңгілік тағзым» тақырыбындағы дөңгелек үстел жұмысы өтті.
Дөңгелек үстел жұмысына М.Өтемісов атындағы БҚМУ доценті, т.ғ.к. Боранбаева Б.С.; Батыс Қазақстан мемлекеттік архивінің директоры Савгабаева А.Н.; Х.Досмұхамедов атындағы Атырау мемлекеттік университетінің т.ғ.д., профессор Аққали А.Қ.; «Егемен Қазақстан» газетінің БҚО-дағы меншікті тілшісі, өлкетанушы Қазбек Құттымұратұлы; С.Датұлы атындағы тарихи – өлкетану музейінің меңгерушісі Ойшыбаева А.М. қатысты.
Дөңгелек үстелдің мақсаты - аштық құрбандарын және жаппай саяси қуғын-сүргінге ұшырағандарды бір сәтке де еске алу, тағзым ету. Архивтік құжаттар негізінде жиналған деректерді жалпы қауымға таныстыру. 1920-1921 жылдардағы ашаршылықтың шынайы бейнесін көрсету болып табылады.
Дөңгелек үстел барысында Батыс Қазақстан мемлекеттік архивінің директоры А.Савгабаева «ХХ ғасырдың 20-30 ж.ж. Батыс Қазақстан өңіріндегі ашаршылық» тақырыбында баяндама жасады. Баяндамада архивтік құжаттарда Батыс Қазақстан өңірінде орын алған ашаршылық жөнінде көптеген деректер келтіріліп, ашаршылықтың себептері мен сол жылдардағы қазақ халқының басына келген қайғы-қасіреттің зардабы туралы айтылды.
Сонымен қатар, Батыс Қазақстан мемлекеттік архивінің ұйымдастыруымен дөңгелек үстел жұмысына қатысушылар мен студенттерге ХХ ғасырдың 20-жылдарында Батыс Қазақстан өңірін шарпыған, адам баласына соншалықты қайғы-қасірет әкелген ашаршылықтың зардабы мен салдары, уездер мен болыстардағы ашаршылықтың сипатталғандығы және Орал губерниялық аштыққа ұшырағандарға көмек көрсету комиссия мен Америка әкімшілігінің көмегі туралы архив қорында сақталған құжаттар жинағы негізінде көрме көрсетіліп, ұсынылды.
Дөңгелек үстел жұмысына қатысушылар жаппай саяси қуғын-сүргін және ашаршылық құрбандарын еске алу күнін мемлекеттік деңгейде атап өтіп қана қоймай, әр күн жадымызға сақтап, келешек ұрпаққа тұтас ұлтты жойып жібере жаздаған ашаршылықтың ұмытылмауын насихаттау қажеттілігіне шақырды.
Өткен күні, уақыты: 10.04.2019 ж., сағ.15:00
Өткен орны: М.Өтемісов атындағы БҚМУ, № 3 оқу ғимараты, 3-қабат.
Тарих, экономика және құқық факультетінің акт залы.
Ғылыми-анықтамалық аппараты, құжаттарды пайдалану және зерттеушілермен жұмыс бөлімі
